A convivencia ten que ser un ben en si mesmo pero para iso Narón tense que volver amábel para as persoas de todas as idades. Se conseguimos que os nenos e nenas, persoas maiores e as persoas con capacidades distintas teñan o seu espazo a compartir coas demais, teremos un espazo para todos e todas. Para iso reforzaremos diferentes cousas concretas:

5A-Zona 30 para asvías urbanas e zona 20 para as zonas de coexistencia peón - vehículo

Crear núcleos de centralidade nos barrios, restrinxindo o tráfico motorizado desas zonas a residentes e servizos. Crear vías de comunicación entre eles. Os núcleos de centralidade son:

1. Praza da Gándara para o barrio da Gándara

2. Avda. da Solaina para Santa Icía

3. Entorno do concello - Biblioteca, praza de Galiza, parque de Chafarís para o Alto

4. Praza do antigo concello para Xuvia

5. Praza de Álvaro Paradela para Freixeiro e Piñeiros

5B- Estacionamentos disuasorios nos barrios. Puntos de recarga eléctrica neles para vehículos.

5C- Crear contornas e espazos seguros ten a ver con moito elementos a ter en conta. Dividimos 5 grandes grupos que se completarán coa idea número 6:

1. Arte. As paredes poden falar e o feísmo transformarse. Os murais e a arte como elemento que desenvolve sentimento de pertenza, pode honrar a nosa memoria histórica e eleva a paisaxe urbana a arte.

2. O comercio. Centros comerciais abertos. O comercio e as pemes son espazos que, se están en convivencia e forman parte dos barrios e parroquias satisfacen necesidades esenciais (como puidemos comprobar na pandemia) e aseguran a vida e a continuidade dun barrio ou parroquia. Unha función esencial sobre todo nas zonas rurais. Promover e reforzar o comercio local de todo tipo e o traballo emprendendor é necesario 

3. Funcional. O mobiliario urbano para usos esenciais e cotiás: descansar, beber auga, ir ao baño, papleiras.... todo isto é necesario pero tamén mobiliario para usos festivos e lúdicos coma os picnics, os hortos, rutas culturais e naturais, posta en valor do patrimonio inmaterial. Xogos para ciranzas cada pouca distancia. Espazos alternativos para a mocidade. Prazas pensadas para todas as idades no medio da cidades, do comercio, non expulsar ás persoas a parques ou lugares concretos se non unha mobilidade amábel sempre.

4.Mobilidade activa. As mobilidades peonís dan tamén lugar á convivencia entre as persoas que se atopan.

5.A natureza. Elemento esencial da calidade de vida, a súa presenza é necesaria e tamén educativa, social e pon en valor o noso lugar, o espazo que compartimos como cidadás. Xardíns verticais, sendas verdes, recuperación da contorna dos ríos que pasan por Narón, hortos urbanos e promoción da biodiversidade entre as comunidades educativas e entidades sociais.